Boorn & Boerschop 2019-03: Ik zeg nog tegg’n JanWillem en Jens geet nao ‘t café

Auteur: Zwier Kremer

Ze zaten elke moand één keer ‘nen oavend biej mekaare. Um biej te blieven van wat d’r in de buurte zoal gebuurn. ’t Waren de vrouwleu van de amfibieënbuurt. Zes bewoners van de Kikkerstroat.. de nummers 1,3en5 en an de oawerkaant de nummers 2,4 en 6. Zee vunden dat belangriek; nich dat ze niejsgierig waren; dat veel nog wal met. Meer ’t was toch wal ’n betke sociale controle. Iej könt ’t nooit weten, woar of ut good vuur is. De leu van de Salemanderstroat en de Paddenstroat vunden dat onzin… waren ok völ te drok um biej mekaar op de lippe te zitten. Door waren de va en moo allebei an ’t wark en dan weet iej ’t wal..Gin tied vuur proatsessies. Meer in de Kikkerbuurt, ze neumden dat ok wal de kwakerbuurte, doar hadden de vrouwleu gin tied um te warken, umdat zee zo onmeundig völ te proaten hadden. En hoewel d’r nooit iets biezunders gebuur’n konnen zee toch wal nen oavond vol proaten. Nee dat was gin enkel probleem, want a-j Reuske kèènt, dan weet iej van te vuurt’n da-j zulm nich völ hooft te vertellen. Reuske is ‘etrouwd met JanWillem. JanWillem is de rust zölve. Meer Reuske….is net aansumme; Den zöt alles, den heurt alles en den weet alles… en dan heb iej heel wat te vertellen. JanWillem is, zoas ik al verteld heb van nature ‘nen rustigen keal, ’n man van weinig weurde. Da’s meer good ok; want Reuske pröt destemeer; pröt zogeaamd vuur heer verstaand oet. Zee pröt drok en vlug en aait verdan. Zoda-j d’r zölm hoast van achter ’n oadem komt. – “k Hebbe vandaage de koffie is probeert dee in de reclame was. ’t Was 3 cent goedkoper as de smaakmaker van de buurtsuper.” “Ik zei nog tegg’n Janwillem : As iej ’t good smaken veendt, dan haal ik d’r miej morgen nog un stuk of wat pekke biej..” En iej könt ut geleuwn of nich, hee vond dat de koffie good te dreenken was. Ik veel zowat achter oawer van veraltereerdheid. Want Janwillem en wat niejs. Ik dacht biej miej zulm: d’r is um ‘n aap oet de reet ‘esprongen. Want as ik met wat niejs komme dan kuj d’r van op an dat hee tegg’n is. Oonzen Margje von dee koffie ok al naar lekker. -Mear weet iej ‘t al? Oonzen Margje geet binnenkort samenwonen. Zee hef ’n jong an de haak ‘eslagen. ’n Leuken jong! Zo alderbasten leuk…dat wil iej nich weten. Ik heb aait wal ‘edach, as oonzen Margje d’r enen an de slippe krig… Dan mot ut wal iets goods wean. Zonne struusen deerne en zee zöt d’r ok wieder mirakels good oet. Ik zeg nog tegg’n Janwillem : Doar kan zee met vuur ’n droad kommen. Meer weet iej wat hee too zear? Wat mut zee now met ’n jong. Zee kan eerst better goan warken an heur barrieëre. Zo zee’j meer wier: Janwillem is oaweral tegg’n.” “Heb iej dat ok al.” Zear Marietje, terwiel Reuske efkes noar lucht mos happen. “Ik zal oe is wat aans vertellen. Too ik Garrit vuurstelln um plastieken steule an te schaffen, dee-j de hele weenter boeten könt loaten stoan en ok nooit hooft te varven, weet iej wat hee doarop zear?” “Onzin; kunststoffen steule zint slecht vuur ’t milieu. En oonze steule zint nog good genoeg. Dee hoof iej ók nooit te varven. Wie leit d’r gewoon ‘nen oalen dekken op en dan kan ik d’r zelfs met ’t zundagsblauw mien gat op daal smieten…. En dan heb iej ’t ok nich zo koold an ’t gat.” “No wil ik ok eens effen wat vertellen.”Zear Teuntje. “Now iej ’t toch oawer steule hebt; ’t Is wal toevallig… want wiej hebt de vurige wekke 4 steule an’eschaft. Mear dat bint eekenhoalten steule. Greune steule. Dat is good vuur ’t milieu; want d’r wordt vuur ’t hoolt dat hier vuur ‘ebroekt is, wier nieje beume ‘epot” “No,”zeer Reuske, doar geleuf ik niks van, want ik heb kottens eleazen dat doar met ‘ezwendelt wördt. Ik bin vuur plastieken steule, want dee kö-j wier risaikeln. En at hoalten steule oald bint, dan mut iej ze verstokken en dat is wier van invloed op de ozon loage.”

“Ozon loage? Wat is dat; hoo mean iej dat?”zear Jannie “oh, weet iej dat nich? Dan zal ik oew dat efkes oet de deuke doon. Dat bint gerdiene dee onzichtbaar in de loch hangt. En a-j tevöl stokkert keump doar un gat is en dat is wier slecht vuur ’t milieu. Want dan hef de zunne vriej spel um oons an de kok te brengen. ’t Zal nich zo lange meer doern, dan is d’r gin Noordpool en gin “Zuudpool meer. En dan heb iej alleen nog ‘ne Carpool oawer. En den he-j dan ok nich meer neudig, want dan kö-j gin auto meer riejen, zo hoog as ut water dan steet. En de huuze wordt dan op pööle ‘bouwt. Ik zeg nog tegg’n JanWillem : At ut zo duur geet mut wiej oons nog ‘nen droon anschaffen, um de bosschuppe te goan halen.” Too zear Johanna: “No mu-j nich zo oawerdrieven, want zo arg is ’t ok wier nich. In de eerste plaats is d’r nog ies genog op de Noord-en zuudpool en doert ut nog minstens 200 joar vuurdat ut zo wied is. In dee tied kan ’t wa wier zo onwies hard goan vreezen, zodaj op de schaatsen de bosschuppe mut doon. Ik zol de schaatsen veurlopig dan ok nog meer nog meer nich op markplaatse zetten.” Johanna zear nich vake wat, mear zee leut zich ok niks wies maken. “Ik zegge toch ok nich dat ik de iezers op markplaatse zet. Ik heb geels gin schaatsen.”Zear Reuske, dee zich un betke op de teene ‘etrapt veulden. “Ik zear laatst nog tegg’n JanWillem: As iej nog un keer hen schaatsen wilt mut iej d’r nog vlot un stel kopen. Want moch ut nog ens un keer goan vreezen, dan zint ze völ te duur. En aj ze dan haalt, kiek dan eerst is biej de Kringloop, want doar hebt ze d’r vast nog wal wat liggen, dan hej ze vuur ’n zacht prieske. Doarbiej ze hooft ok gin 200 joar met te goan.” Zo gung ut d’n heelen oavond verdan. En Greta zat d’r meer biej te luustern en of en too te knikken of stillekes met ut heufd te schudden en dach bie zich zölm: “Woar hebt zee ut toch oawer. Dat bint toch nich de dinge woarumme as iej biej mekaare komt?” En as un Friezen stoander verbrak zee, op het moment dat Reuske wier efkes mos oadem halen, de stilte en zear: ”Oonzen Jannemieke mut binnenkort examen doon. “ “Oh joa? “brak Reuske d’r tuske duur.” Studeert oewen dochter? Doar wus ik niks van. Ik zeg laatst nog tegg’n JanWillem: Woar zol Jannemieke toch aait hen goan, as ik heur vuurbiej zee fietsen. Oh…. dus ze studeert en wat studeert zee dan zoal.” “Ze döt gauw examen in voedingspatronen.” Zear Greta “Wat mut ik miej doar biej vuurstellen? ”Zear Reuske. Dat is heel breed… kan van alns wean. As vuurbeeld: Zee mut binnenkort un scriptie maken oawer koffie. Um oet te zeuken van wat vuur soort koffie de beste koffiedik oawerblif.” “Woar is dat now good vuur.”zear Reuske. Dat za’k oew vertellen, zear Greta. De beste koffiedik, dee ‘nen gezoonden broenen kluur hef, hebt de geleerde leu neudig, um oons nog meer wies te können maken oawer oonzen kleinen planeet in het onmeundig groot heelal. “Oh is ut dat… Ik zeg kottns nog tegg’n JanWillem…”

Jens geet noa ’t café

Too, zeg Jens, doot mie een börrelke
’t zat mie al zo teeg’n vandage
als leup in ’n krul, het was nen pröttel
en ik heb kopzeerte van ‘t geklage

en ik heb toch zo mien best doan
veur ’t haan’gekrei’j wa’k al oet ’t nös
den helen dag he’k loop’n klei’jn
en noe heb ik onmeunig dös

wat he’k é pokkelt en é wosselt
de tuffel rooit, ’t vearken voort
de beeste mölken, hoonder slacht
en mien Dieka zwat vermoord….

want wak ok deu, niks d’r van deug’n
te bassen werken, niks was good
too hek de bats noa eeren kop smett’n
“ik dach da’j ’t noe mèr zolm ees doot”

“ik wil nich langer veur oe klei’jn
den pröttel zeuk ie zölm maar oet
geëmancipeert as wa’k een vrommes
zoep ik mie ’n mooi stuk in de hoed

doarum, zeg Jens, doot mie nen borrel
het zat mie’j al zo teegn vandage
en ik heb nog steeds zo’n kopzeerte
kopzeerte he’k van eer geklage

doot mie nen borrel zeg é
nee, wat ’t is, doot d’r ma vief
dan hek mon’n ok vast wier kopzeerte
mar dan hek het nich van ’t wief.

Gedicht van Gerrit Rensink, pseudoniem Wossen Gait. Uit de bundel “ZUNDAG”.

(–> naar PDF versie van deze publicatie)

(–> naar inhoudsopgave 2019-03)

(–> naar Boorn & Boershop pagina)