Boorn & Boerschop 2010-02: Oet de oale deus…..Christelijke zangvereeniging Soli Deo Gloria

Auteur: Henk ten Thije

Oons, jammer genog nig meer bestoande, Boornse zangduo “De Eigenheimers”, zung ooit ’n machtigmooi leedje dat schreem’n is duur Jan Kleinman en dat heet’n Fotoos. Dat gung oawer opruum’n en in ’t bizonder oawer opruum’n van deuzen met oale fotoos. Ieleu keant dat wa, iej goat ’n zoolder op en iej begint en veurdaj ’t weet is’t ett’nstied want biej elk’n foto is ‘n verhaal.

Dat leedje gung zo:
Ik heb ne deus met fotoos nog aait in ’t keske stoan.
Ik mur ze neudig oetsorteer’n, in ’n album plakk’n goan.
Ik bin d’r lest met gangs e’wes, bleef biej alle fotoos stekk’n.
Dee plakkeriej dee scheut nig op, ik heb ze völ te lang bekekk’n.

Refrein:
Fotoos, fotoos, het bint papier’n ding’n,
mer elk’n foto hef veur miej, aait ne herinnering . . . . . .

en dan ’t laatste couplet:
Joa fotoos van zovölle leu, dee d’r alle nig meer bint.
Fotoos oet dee vrog’re tied dee ‘j noe anstekkelijk vindt
Joa, in dee deus met fotoos lig mien geschiedenis
ik mut ze neudig in goan plakk’n, mer dat geet miej steeds wier mis.

(’t hele leedje steet wierderop in dit blad).

Zoas e’zeg, dat geveul dat Jan Kleinman zo mooi hef verwoord, dat wil wiej probeer’n oawer te breng’n in dizze nieje rubriek in Boorn & Boerschop. Wiej wilt geern oale fotoos plaats’n en doarbiej een verhaal oawer de leu dee d’r opstoat, hoo heett’n ze, (as’t kan met biejnaam’n) en woarum wöd’n dizzen foto maakt.

Doorum leu; hej oale fotoos en iej keant de leu dee d’r opstoat en ’t verhaal d’r achter, nem dan contact op met Henk ten Thije (van Wilm van Troo Hennik) telefoon 2663377 en wiej probeert ’r wat van te maak’n.

Dit keer dus nummer 1

De christelijke zangvereeniging Soli Deo Gloria, (zo steet ’t op ’t vaandel) heel lang de oaldste vereniging van Boorn, op´richt op vriejdag 1 juli 1898. Dizze oprichting vun plaats op veurstel van doomneer J. van´t Hoof, ´n Nederlaands Hervormd´n doomneer den van 1896 tot 1901 in Boorn stun. Hee wödd´n ook geliek ´n eersten vuurzitter. D´r meld´n zich 39 leed´n an. De contributie was 5 ceant in de wekke en ´t joarsalaris van ´n direkteur, zoas ze toen ´n dirigent neum´n, bedreug 50 guld´n.

Deur de joar´r hen wödn d´r metwearkt an kearkdeenst´n, gung´n ze te hoop op pad, wöd´n d´r
´n jeugdkoor op´richt, wöd´n d´r bazars organiseerd, grote klassieke wearken oetvoert, zoas de oratoria ‘Die Schöpfung’ en ‘Die Jahreszeiten’ van Joseph Haydn met solist’n en ’t Oaweriesels Philharmonisch orkest en . . . gung´n ze noar concoursen.

Zo ook in 1928. Op Hemmelvoart gung Soli, zoas ´t koor intussen in Boorn wöd´n neumt, noar ´n concours in Deeld´n.
D´r wöd´n good zung´n, alleen har´n direkteur met de repetities veurof nig zeen dat´r ‘n gedeelte herhaald mos wöd´n. Een koor dat noa Soli kwam deer dat wa en toen meark´n ´n direkteur dat hee ne fout har maakt en volg´ns de oawerleavering, was hee kats van ´t rabat. Hee kloarn wier op toen e heurn dat ondaanks dat, Soli toch de eerste pries har wun´n in de 2de ofdeling met 308 peunt´n.

Twintig joar later, in 1948, besteet Soli 50 joar. Op zoaterdag 25 september is t´r receptie in ´t gebouw van Christelijke Belang´n an de Prins Bernhardlaan. (later v.d.Laan / v.d.Werf). Veurzitter W. ten Thije huldigt W. Floris Nap den dan 25 joar dirigent is en
H.J. Hilverink (Tichel Hennik) den 20 joar veurzitter is e’wes. Ter geleeg’nheid van dit 50 joarige jubileum wödd’n d’r n’n foto maakt veur’t oale gemeentehoes.
Kiekt ze glimm’n in ’t beste pak . . . . . .

Afb. 01:

Veuran v.l.n.r.:
B.ter Haar-Heutink, R. Dubbeldam-Dros, M. Evers, M. Lantinga-Smit, S. Hilbrink-Steinman (Sien van de Köster), H.J. Hilverink (Tichel Hennik), B. Kevelham, W. ten Thije (Wilm van Troo Hennik), W. Floris Nap (dirigent), H. Bootsma, H. Knoef, H.J. Hondebrink, D. Wiemer (Wiemer meneer), M.Wiemer-Harder.

Tweede rieg v.l.n.r.:
L. Paalberends-van Huizen, A. Kevelham-Telman, G. Kevelham-Haveman, W. van de Velden-ter Horst, J. Dokter, S. Philipsen, J. Veldhuis-Nijhuis, D. van Dijk, T. ten Napel, L. Boom-Nijhof, M. Vos-Hondebrink, K. Okkes, G. Swienink. M. Nieuwenweg, M. Ketelaar-Lucas, S. Klein Bruggink, D. Teusink-Pool, A. Nijhuis, D. Zondag, D. Meulenbeld-Schrik, S. de Jong, T. Wisman, J. Dokter, A. Posthuma-Smit, M. de Jong, A. Bootsma.

Achterste rieg v.l.n.r.:
J. Klepper, H. Pauwels, H. de Weerd-Dijkslag, L. Oost, M. Langejans, J.W. Kevelham, H. Boom, J. de Weerd, B. Teusink, G. Schrik, H. Meulenbeld, R. Zondag, H. ten Donkelaar, A. Bootsma, J. Gierveld, D. Zondag. R. Kremer, H. Hondebrink.

Op 1 juli 1988 besteet Soli 90 joar. Jammer dat ‘t deur te weing anwas van nieje leed’n steeds miender geet met Soli Deo Gloria. D’r wodt vanalns oondernömm’n um ’t spul wier in de been’n te krieg’n mer ’t mag nig baat’n.

In 1997, één joar veur ‘t 100 joarig jubileum, trekt ze ’n stekker d’r oet en hoolt, wat ooit de oaldste vereniging van Boorn was, op te bestoan. Gloep’ns jammer!

Daank aan

• archief Soli Deo Gloria.
• Jan Kleinman.

Fotoos (gedicht van Jan Kleinman)

Ik heb ne deus met fotoos, nog aait in ’t keske stoan,
Ik mut ze neudig oetsorteer’n, in ’n album plakken goan.
Ik bin d’r lest met gangs ewes, bleef biej alle fotoos stekk’n.
Dee plakkeriej dee scheut nig op, ik heb ze völ te lang bekekk’n.

Refrein

Fotoos, fotoos, het bint papier’n ding’n,
mer elk’n foto hef veur miej, aajt ne herinnering.

Dit oale blasse g÷l petret, Grootva as jong’n man,
hee kik miej oet’t verleed’n heel kalm en röstig an.
Oh jee . . . dit miene schoolfoto, doo’k acht of neeg’n was.
Doar stoa’k braaf nöast de schooljuffrouw met de hele deerde klas.

Refrein

Hier stoak dan zelm nog as soldoat, baretje op één oor,
‘n lesten hop van ’t Vaderlaand, zo liek ik eerlijk woar.
En hier ne trouwfoto van Tante Trui, in ’t wit, mer veer moand hen.
Ik zölm met n’n matrozenkraag op de brulft van Trui en Ben.

Refrein

Hier mien Va, tusken de dalia’s doar achter in ’n hof.
Iets wieder zee’j mien Moo nog stoan, den knipt t’r ene of.
En hier hew wier ne trouwfoto tante Sien en Ome Toon.
Mer Sien den har zich, zeer mien Moo, better in de bokse könn’n doon.

Refrein

Kiek hier ne foto van oom Wilm, hee is a joar’n dood,
’t was zo’n heanig keerlke, ‘n betken foel, mer wieders good
En hier hew tante Leida nog met opoe biej de poomp
op ’t heukske van dat riejke huuz’ met ne knipmus en op kloomp.

Refrein

Joa fotoos van zovölle leu dee d’r all nig meer bint.
Fotoos oet de vrog’re tied dee’j noe anstekkelijk vindt.
Joa in dee deus met fotoos lig mien geschiedenis.
Ik mut ze neudig in goan plakk’n, mer dat geet miej steeds wier mis.

Refrein

Fotoos, fotoos. het bint papier’n ding’n,
mer ieder’n foto hef veur miej, aait ne herinnering.

(–> naar PDF-versie van deze publicatie)

(–> naar Inhoudsopgave 2010-02)

(–> naar Boorn & Boerschop pagina)