Auteur: C. ter Hennepe-Lammers
Um Boorn hen
As iej um dissen tied oe wilt verzetn
Mör ie eerlik woar dan nich vergetn
Um dicht biej hoes ees good te kiekn
Want dan zal oe wa heel rap bliekn
Dicht biej de deur is noar ik meen
Na veul moois veur oons te zeen
Op de fiets of met de benewaage
Mu’j der op oet disse zommerdaage
Gaat ees noa Oasel – kiek daar ees roond
Roek dan de loch da’s pas gezoond
Heurt dan de veugel dee fluit aaltied weer
Da’s ok veur oe – begriep dat toch meer.
Dee oale eekn ze staat der a joaren
Ze geewt oe scha zoonder völ bezwoaren
Fiets dan bedaart op Twickel ees an
Kiekt um oe hen zovöl as ‘t mer kan
Zet oe ees daal op zunne hoolten baank
Iej beurt dan de stilte, minuten laank.
Nen jongn veugel den zien mooder röp
En ‘n knientje dat vlak langs oe slöp
Dan goa’j wieder – Wendezoele, ölliemöl
Kiekt good um oe hen, iej zeet dan zovöl
Roondom Baarn jao nog völle meer
Gaat ees noa Hettum of Soasel ne keer.
Zeet dan hoo alns weer is goan greuien
En zee iej het daar ok wa ees bleuien?
Ken iej ‘t verhaal nich van het Mölnven
Gaat dat ees heurn – loop d’r mer hen
Biej ‘t café gebroek iej dan koffie met kook
Daar steet het verhaal wa in ‘t grote book.
Iejleu begriept wa ik kan het nich loaten
‘k Mur oe verteln van essen en moaten
Loop, fiets d’r oet dan veul iej oe vriej
Alns ku’j vergetn iej bint dan weer bliej.
(–> naar PDF-versie van deze publicatie)
(–> naar Inhoudsopgave 1997-01)
(–> naar Boorn & Boerschop pagina)