Auteur: Nahoj Moobeznag
Non de kerstdaagn der an komt en temet noa niejoar de daagn a wier lengt, lik t miej good urn is n luk oawer de kerstdaagn van vrooger te verteln. Ik kwam oet n groot gezin. Oens vader, oens moe en acht kiender. n Ooldsten was n wichtken en de jongste was n wichtken en doar zatn wiej met zes jongs tusken. Kö’j wa noagoan dat t der soms na an toogung, in de gooden zin van t woord. Van oens jongs wadn der dree biej het jongskoor van de steefenis keark. Wekke van tevuurten wadn wiej drok an t repeteern vuur de nachtmis met kerstmis. Dee nachtmis was toen biej oens nog urn dree uur snachts. Urn kwart oawer twee maakn oens vader oens wakker. Met sloaperige oogn en bibberend van de keulte stunn wiej in de kamer. Met t wasken mössen wiej op mekaa wogn want wiej hadn nog n poemp in de kökn. De plee was nog n tönken met n hoalten deksel der op. As wiej mössen plassen dan gungn wiej noar boetn. Achter t hoes wadn twee brödn plaatst schuun teegn mekaa an en doar konn wiej dan terecht. As wie dan wier kwamn oet de keark, zoo teegn half zes (toe wadn der nog dree missn) dan was t lekker waarm in hoes. Oens moe had good wat cooks in n kachel doan en iej konn de koffie roekn. Dan kreegn wiej ne beskuut en n snie stoet. Dat kreeg wiej alleen met kerstmis en as oens vader en moe jeurig wadn en soms nog n köpken kekouw.
Noa t etn dan wördn de keerskes anstökkn. Dat wadn toen nog van dee gedreejde keerskes zo lang en zo dun as nen vinger. Ze mogn tien minuutn braandn want soams mössen ze ok wier an. Dan zungn wiej allemaal met mekaa kerstversjes “Stille Nacht”, “De herdertjes lagen” en Mensen gij die waart verloren” en nog völ meer. Oens moe gung urn acht uur noar de keark en oendertusken bakn oens vader bloodkook en lewerworst dat wiej hadden kreegn van Oom Bennard van t Hesselder met ok nog nen metwos.
Met heimwee deank ik terug an dee tied. Wiej hadn t nig breed mer dee tevreanheid dee waarmte dee biej oens was. ze konn oens nog met ne kleanigheid bliej maakn. Soams woddn kaart, damt of ganzebord spöld. Er kwam dan n half poend aapnnötjes op toafel en dan meer döpn… Hoo bliej wadn wiej dan. Urn tien uur soams lag alns op ber. Non goat de jonge leu urn tien of elf uur nog noar de disko. De TV hef ok völ kapot maakt. Mer ok met de kerstdaagn is t nig meer as vrooger. Non hebt ze ok ne nachtmis vuur jongeren, woarduur t gezin oet mekaa wodt haalt. As good katoliek gungn wiej vrooger noar de H.Mis. Aj non in de keark komt dan zegt ze : “Hartelijk welkom bij deze eucharistieviering”, in de dienst wordt voorgegaan door Pas tor… en de volgende H.Mis is urn elf uur. Leu köj der wies oet wodn? Töt een volgende keer.
Nahoj Moobeznag
(–> naar PDF-versie van deze publicatie)
(–> naar Inhoudsopgave 1995-02)
(–> naar Boorn & Boerschop pagina)